Цасхан чамдаа...

Цасны чихран чихрах чимээ бодолд хөг нэмдэг болохоор цасан дээгүүр алхах дуртай би. Гишгэсэн мөрөө эргээд хармаар тийм цагаахан цасан дээгүүр алхахдаа сэтгэл ариусахыг мэдрэх сайхан. Хичнээн гунигтай байсан ч цасан ширхэг зөөлхнөөр хаялан ороход би тайтгардаг. Хичнээн дургүй байсан ч дааран дааран цасан дунд зогсмоор санагддаг.

Би цасанд тийм л дуртай. Хол байсан хайраа санахдаа цас чамаар зөндөө хань хийсэн. Хүрээд ирсэн хойно нь ч гэсэн цас чамаар зөндөө гоёсон. Харин одоо цас чамд дуртай болохоороо сэтгэлийн үгээ бичин сууна. Чамд хайртай болохоор өвлийн улиралд ч би хайртай.

Улирал бүр өөр өөрийн өнгө аясаараа хүний сэтгэлийг татах увьдастай.