Үхэн үхэтлээ салахгүй шүү

Би нөхөртэйгээ ам мурийх болгондоо "Хоёулаа бүтэхгүй юм байна салъя" гэж хэлдэг байлаа. Дараа нь найзындаа эсвэл ээж дээрээ очно. Хэд хоногийн дараа санаж, нэг л мэдэхнээ эвлэрчихсэн байдаг. Гэтэл өчигдөр бид хоёр ахиад л маргалдлаа. Үнэхээр тэсгэл алдаж, усан нүдэлсэн би энэ удаад жинхнээсээ сална хэмээн уурлангаа хаашаа явах  тухайгаа бодон алхана.


Намайг гутарч гунисан үед минь өөдрөг болтол нь сэнхрүүлдэг хуурай эгч бий. Түүн дээрээ очтол инээмсэглэн намайг угтаж авлаа. Хуурай эгчийн гэр бүлийг хоорондоо маргалдаж байгааг нь би огт харж байгаагүй юм. Би гайхахдаа "Надаас нуугаад хэлдэггүй юм уу эсвэл та хоёр огт маргалддаггүй юм уу?" гэж асуусан юм. Харин эгч минь "Маргалдалгүй яахав дээ. Гэхдээ би түүндээ хэзээ ч салъя гэж хэлдэггүй юм. Яаж ч хэрэлдсэн яаж ч эвтэй байсан нэг л үгийг би хэлдэг. Салахгүй, юу ч болсон хамаагүй би чамаас үхэн үхэтлээ салахгүй, наалдаад л байна шүү дээ гэж хэлдэг юм. Энэ үг биднийг бие биедээ итгэх итгэлийг өгдөг. Нөхөртөө ингэж хэлвэл энэ хорвоо дээр өөрийг нь хэзээ ч орхихгүй итгэлт хүн бий гэдгийг мэдэрч итгэлтэй болдог юм гэж хэлсэн юм даа.



Үүнийг сонссон би гэрлүүгээ буцаж очтол нөхөр маань өчигдрийн хоолоо халааж идээд л тун өрөвдөлтэй сууж байх юм. Намайг харангуутаа хоолоо идэхээ больж, гэнэт бичиг цаас бариад компютерийнхоо ард суух нь тэр. Харин тэр үед би " Ер нь би үхэн үхэтлээ чамаас салахгүй, чамд шавар болоод ч хамаагүй" гэж хэлтэл нөхрийн минь царай ямар болсныг үгээр хэлэхэд бэрх юм. Нүдэнд нь нулимс цийлэгнэж, баярлалаа хайраа гэж чанга тэвэрсэн юм даа. Эвлэрэх үед сэтгэл ямар сайхан болдгийг бүсгүйчүүд минь мэднэ биз.

Надад тохиолдсон энэ зүйлийг бүсгүйчүүддээ хүргэвэл  хэн нэгэнд тус болох болов уу гэж та бүхэндээ хүргэлээ. Нөхөртөө хэлээд үзээрэй "Үхэн үхэтлээ би чамаас салахгүй, наалдаад л байна шүү" гэж.