Эрүүл мэндийн яам ”Сургагч багш” нарыг бэлтгэж эхэллээ
Ингэснээр эрүүл мэндийн салбарт ажиллаж буй бусад эмч, ажилчдад сурталчлан таниулах, шинэчлэлийн бодлогыг хэрэгжүүлэх үйл ажиллагааг эрчимжүүлэх ажлыг цаашид орон даяар үргэлжлүүлэн хийх юм байна.
ДЭМБ-ын Ерөнхий захирал Др Маргарет Чан Монгол улсад хийсэн айлчлалынхаа үеэр эрүүл мэндийн бодлого, түүний хэрэгжилт, дэд бүтэц, , хүн амын эрүүл мэндийн үзүүлэлт гээд бүгдийг дүгнэж хэлэхдээ, “Танай улсын эрүүл мэндийн салбарын бодлого чиглэлийн хувьд зөв үе шатаар явж байгаа юм. Харин бодлогоо хэрэгжүүлэх чадавх сул байна” хэмээн дурдлаа. Энэ тухай Эрүүл мэндийн сайд Н.Удвал сургалтыг нээх үедээ онцлоод, Монгол улсын эрүүл мэндийн салбарт хийгдэж байгаа суурь шинэчлэлтэй холбоотой мэдээллийг товч танилцууллаа.
Энэхүү “Эрүүл мэндийн байгууллагын суурь шинэчлэлийн бодлого”-ыг сурталчлах сургагч багш нарыг бэлтгэх үйл ажиллагааны хүрээнд:
• “Эрүүл чийрэг Монгол хүн” хөтөлбөр- Эрүүл мэндийн суурь шинэчлэл
• Эмнэлгийн тусламж үйлчилгээний хүлээгдлийг бүртгэх, мэдээлэх
• Байгууллагын эрсдэлийн удирдлага, үнэлгээ
• Эрүүл мэндийн мэдээллийн технологийн шинэчлэл
• Анхан шатны эрүүл мэндийн байгууллагын тусламж, үйлчилгээний багц
• Анхан шатны эрүүл мэндийн байгууллагын тусламж, үйлчилгээний стратеги /өрх, сум, тосгоны эмнэлэг/
• Эмнэлгийн тусламж, үйлчилгээний чанар аюулгүй байдал
• Эрүүл мэндийн байгууллагын хөгжлийн хөтөлбөр
• Эрүүл мэндийн ажилтны хариуцлагын даатгалын тухай
• Эмийн чанар, аюулгүй байдал
• Эмч, эмнэлгийн мэргэжилтэн, ажилтны харилцааны хэм хэмжээ
• Сэтгэлд нийцсэн найман үйлчилгээ
• Эрүүл мэндийн санхүүжилт
• Телемедицинийг хөгжүүлэх нь
• Эрүүл мэндийн технологийн нэгдсэн бодлого гэсэн чиглэлүүдээр дээрх сургалтыг зохион байгуулж байна.
