Үнэ цэнэтэй гучин нас

Олон олон сонголт, баяр гуниг, хүсэл мөрөөдлийн дундуур туучсаар нэг л мэдэхэд 30 настай нүүр тулах нь. Дөнгөж саяхан хормой дэрвүүлэн зөрж одсон 18-т шиг догдолсонгүй ахиад нас нэмэх нь гэж гунигласангүй. Зүгээр л бодолд автан хуучин тэмдэглэлийн дэвтэрээ сөхөж хэсэг суулаа. Сургуулиа төгссөн, ханиа олсон, ээж болсон, аавыгаа алдсан, өөрийгөө олох гэж бэдэрсэн, гэнэн тэнэгхэн он жилүүд ард минь гар даллан зогсох шиг санагдана. Алдаа нь тохуурхаж, оноо нь надаар бахархалтайяа араас минь цоо ширтэж байгааг мэдэрч байна.



 Эргээд харахад амьдрал чамаас би дэндүү олон зүйлийг авсан бас алдсан ч юм шиг. Гэвч шувуу шиг эрх дураараа намайг энэ байгаагаар нь хайрласан, тунг нь тааруулсан зовлонгоор хатуурхсан хувь тавилан чамдаа гомдож тунихын учиргүй.Тэр олон зөв бурууны хэлхээсээр л өнөөдрийн жинхэнэ “би” бий болсон юм чинь. Тэгээд цаашаа өөртөө исгэлэн ч биш, чихэрлэг ч биш яг л боловсорч гүйцсэн жимс шиг хамгийн гоё насан дээр ирснийг сануулав. Үүнээс хойш дандаа өөрөө өөрийгөө эрж хайсан, заримдаа өөрөө өөртэйгээ зөрчилдсөн бас урьд урьдынхаас ч илүүтэй амьдралын утга учрыг танин хүсэл мөрөөдөлдөө хүрэх гэж тэмүүлсэн он жилийн цуглуулга байх учиртайг мэдэрч байна.



Одоо л өндөр өсгийтөө углаж өөрийн дуртай цүнхээ бариад төсөөлж байсан амжилтын зүг яарах ёстой юм шүү гэж дахиад шивнэлээ. Сэтгүүл дээрх дэгжин бүсгүйг хараад өөртөө итгэлгүйхэн толинд харж байсан охин нас минь аль хэдийнэ ард үлдэж. Ямар ч л байсан гэнэн томоогүй өдрүүд чамдаа би өөрийгөө олсон 30 настай бүсгүйн хувиар чин зүрхнээсээ баяртай гэж хэлэх учиртай юм.



Цаг хугацааны тоосонд дарагдаж өнгөө алдаагүй, өөрийнхөөрөө үзэсгэлэнтэй, үнэ цэнэтэй, түүнээс ч илүү нь чин хүсэл мөрөөдөлтэй он жилүүд намайг сэтгэлд дотно инээмсэглэн намайг угтана. За байз, хувцасны шүүгээ уудлая, өмсөх дуртай даашинз минь юу сан билээ. Зүүх дуртай урт ээмэгээ гаргаж, үнэтэй биш ч чамин зүүлт сондоруудаараа гоёод, хэзээ ч уйдахгүй зөөлөн тансаг үнэрт үнэртэнээ түрхэж, үл үзэгдэгч нэрийн хуудас хүн чанар, хүсэл тэмүүлэлээрээ гоёод, хүлээснээс алдуурах мэт, сонгодог хөгжмийн хүчтэй ая түрлэг шиг хүчтэй хэмнэлээр шинэ амжилтын аялалдаа гарахаар догдолно би. Амьдрал чи тоолж барамгүй олон өнгө, үнэр, таахын аргагүй араншинтай. Тэр олон өнгөнөөс хамгийн тод нь, бас хамгийн тансаг үнэр нь гүн эрхэмсэг 30 настай бүсгүй.