Дөрвөн ихрийн охин нь өөд болжээ
Сар гаруйхан өмнө монголд анх удаа дөрвөн ихэр хүүхэд мэндэлж, монголчууд анхны дөрвөн ихрүүдээ баяртайгаар хүлээн авсан билээ. Ерөнхийлөгчөөс эхлээд жирийн иргэн хүртэл тэдэн дээр очиж, биеийн байдлыг нь асууж, аль байдагаа л барьсан. Ихрүүдийн эцэг нь цагдаа тул Цагдаагийн Ерөнхий газраас тэдэнд байр хүртэл бэлэглэж, хотод амьдрахад нь тус дэм болно гэдгээ удирдлагууд хэлж байсан билээ.
Ихрүүдийн аав ээж ч үүнд баярласанаа илэрхийлж, ихрүүдийн ганц охины бие сайжрахгүй байгаа тул эмчлүүлж байгаад нутаг буцна гэдгээ тэд ярьж байсан. Гэвч дөрвөн ихрийн охин нь өнгөрсөн ням гаригт нас барсан харамсалтай явдал болжээ. Охины бие тааруу байгаа тухай эмнэлгийнхэн аав, ээжид нь болон хэвлэл мэдээллийнхэнд төрсөн цагаас нь мэдээлж байсан бөгөөд охиныг тусгаарлан эрчимт эмчилгээ хийж байсан юм. Гэсэн ч хөөрхий охин амьдарч чадсангүй.
Монгол түмнийг баярлуулан, дөрвөн ихрийн сувд нь болж хорвоод мэндлээд, богинохон хугацаанд амьдраад буцсан охины аав, ээж болон гэр бүлийнхэнд гүн эмгэнэл илэрхийлье.
