“Улаанбаатар Сонгдо” эмнэлэг жирэмсэн эмэгтэйд тариа андууран хийжээ

“Улаанбаатар Сонгдо” эмнэлэг нь үзлэг, оношилгоо, эмчилгээ, шинжилгээний багц үйлчилгээг үзүүлдэг Монголдоо томоохонд тооцогдох хувийн эмнэлэгүүдийн нэг билээ. Улсын эмнэлэгт очер дараалал хүлээн зогсож цаг заваа үрэхээс залхсан иргэд хувийн эмнэлэг зорьж хамаг байдгаа шавхдаг нь шуурхай боловсон найдвартай үйлчилгээг худалдаж авч буй хэрэг. Гэсэн хэдий ч мөнгөндөө тохирсон чанартай үйлчилгээг тэр бүр авч чаддаггүй нь нууц биш юм.



Өндөр хөгжилтэй орны жишигт нийцэх үйлчилгээний үнэ тарифтай  “Улаанбаатар Сонгдо” эмнэлгийг зорих хүмүүс сүүлийн үед цөөнгүй болсон. Гэтэл тус эмнэлэг үйлчлүүлэгч нарыгаа эртний хуучин модон орон дээр унтуулж, хуучны модон авдар, эд хогшлоор өрөө, давхруудаа тохижуулсан байх юм. Учрыг тодруулбал “Улаанбаатар Сонгдо” эмнэлгийн дарга өөрөө хуучны эдлэл цуглуулах хоббитой нэгэн гэнэ.






Эзэн хүний хувийн сонирхол эмнэлэгтээ хэрэгждэг бололтой. Яахав бусдаас онцгойрох гэсэн өвөрмөц сонирхол байж болох л юм. Гэхдээ эмнэлэг бол цэвэрхэн цагаан хогшил хэрэгсэлтэй, хаанаас ч харсан цэвэр цэмцгэр орчинд үйл ажиллагаа явуулах ёстой баймаар. Музей биш шүү дээ. Хэдэн арван жил хэрхэн яаж хадгалагдсан нь бүү мэд  эдгээр олон авдрууд хэвтэн эмчлүүлж байгаа өвчтөнүүдийн сэтгэлзүй хийгээд эрүүл мэндэд хэрхэн нөлөөлөх нь огт хүртээлгүй бололтой.



Магадгүй тухайн хадгалагдаж байсан орчныхоо муу муухай энерги шингэсэн ч байж болох шүү дээ гэж зарим нэг нь сэжиглэдэг сурагтай. Мэдээж мөнгөө төлөн хэвтэн эмчлүүлж байгаа хүмүүс тав тухтай орчинд үйлчлүүлэхийг л хүсэх нь тодорхой. Түүнчлэн “Улаанбаатар Сонгдо” эмнэлэгтэй холбоотой жижиг, том ноцтой асуудлууд удаа дараа гарч байсан. Тэгвэл хамгийн сүүлд буюу өчигдөрхөн гарсан нэгэн асуудлыг бид хүргэх гэж байна.

Өчигдөр буюу 10-р сарын 18-ны 19 цаг 30 минутын орчимд манай редакцад мэдээлэл ирсэн юм. Тус эмнэлэгт хэвтэн эмчлүүлж байгаа жирэмсэн эмэгтэйд сувилагч Б нь уушгины бронхит, астматай өвчтөнд хийх ёстой байсан тариаг андууран хийсэн аж.



Болсон явдлыг тодруулбал, жирэмсэн эмэгтэй 8 долоо хоногтой бөгөөд бага зэргийн базалж өвдсөн гэсэн оноштойгоор хэвтэн эмчлүүлж байгаа юм. Харин хамт хэвтэн эмчлүүлж байгаа эмэгтэй нь “Уушгины бронхит, астматай” гэсэн оноштойгоор эмчлүүлж байгаа юм байна. Өчигдөр буюу 18-ны 19 цаг 30 минутын орчимд тухайн өдөр ээлжинд гарч байсан сувилагч Б жирэмсэн эмэгтэйд “Дексаметазол” гэх уушгины бронхиттой хүнд хийх ёстой байсан булчин тариаг андууран хийжээ.



Өвчтөн сувилагчаас ямар тариа хийснийг тодруулахад  “Дексаметазол” гэдэг тариа хийсэн гэдгийг хэлжээ. Сувилагч болон өвчтөн тариаг буруу хйиснийг мэдээд жижүүр эмчид ханджээ. Гэвч эмч завгүй гэсэн шалтгаанаар уулзахыг хүсээгүй байна. Гэхдээ сувилагч Б “Өө яанаа андуураад хийчихэж, уучлаарай” гэжээ. Жижүүр эмч Э-г дуудуулахад цагийн дараа ирсэн байна. Орж ирээд жирэмсэн эмэгтэйг үзээд уучлалт гуйхын оронд  “Бие нь яаж байна? Зүгээрээ, энэ тариаг ганц удаа хийхэд элдэв сөрөг нөлөөгүй. Урагт ямар нэгэн байдлаар нөлөөлөхгүй” гэж хэлчихээд хээв нэг гараад явчихжээ.



Хэвтэн эмчлүүлэгчид  уг тарианы үйлчилгээний талаар интернетээс хайхад урагт хориотой заалттай болохыг үзээд ихэд сандарчээ. Одоогийн байдлаар тариа андуурч хийлгэсэн жирэмсэн эмэгтэйн биеийн байдал хэвийн байгаа ч цаашид урагт хэрхэн сөргөөр нөлөөлж болох эсэх нь тодорхойгүй юм. Тангараг өргөсөн эмч, сувилагч хүн, хүний төлөө чин сэтгэлээсээ үйлчлэх ёстой шүү дээ. Нэг өрөөнд хэвтэж байсан хоёрхон хүний тариаг андууран хийж, хүний эрүүл мэнд, сэтгэл санаанд хохирол учруулсан болгоомжгүй үйлдэл гаргасан нь эрүүл аюулгүй орчинд эмчлүүлэх ямар ч баталгаа байхгүй байна.

Энэ мэтчилэн эмч нарын буруутай үйл ажиллагаанаас болоод гарч байгаа асуудал нэг биш удаа гарч нийгмийг цочроосоор байна. “Улаанбаатар Сонгдо” эмнэлэг алдаа дутагдал гаргаж үйлчлүүлэгчдийнхээ эрүүл мэндийг хохироосон асуудал цөөнгүй гаргаж байсан. Гэвч энэ мэдээлэлд ямар тайлбар өгч, ямар арга хэмжээ авсан талаар бид тус эмнэлгээс болон мэргэжлийн эмч нараас шуурхай тодруулга авч цуврал сурвалжлага болгон хүргэх болно.