Охидоо эх хэлээрээ зөв ярьцгаая

Дэлхий даяараа хөгжиж даяаршихын хэрээр монголчууд олон улсын хэл соёлыг сурах гэж их л хичээж байна. Хүүхэд хөгшидгүй хэлний дамжаанд сууж, сурч боловсрохоо тэргүүн зэрэгт тавих болсон нь сайшаалтай. Гэвч хэл сурахын хэрээр монгол хэлээ хөсөр хаяж, үнэгүйдүүлж байна

  Өнөөдөр охид, залуус мэндлэхдээ “Сайна байна уу” гэж биш зүгээр л “Hi” гэх болж. Ардын сайхан мэндчилгээний үгээ хэлж чаддаггүй юмаа гэхэд, бид ядаж “сайна байна уу” гээд төвшин хэлж чадахаа больжээ.




Өдөр тутмын харилцаанд монгол, англи, солонгос гээд л хэлний цуглуулга болсон өгүүлбэрээр хоорондоо зовох зүйлгүй ойлголцож байна. Энэ бол хөгжиж боловсрохын зэрэгцээ угтаа бол монгол хэлээ мөхөөж байгаа хэрэг.  Хэл холиж ярина гэдэг нь хэр олон хэл мэддэгээ бусдад гайхуулж буй  мэт танд санагдаж болох ч үнэндээ бол маш бүдүүлэг үйлдэл юм. Халтар бултар харийн үгсээр утга төгс монгол үгийг солих болжээ.

Аялгуу сайхан монгол хэлийг залуус бид л авч үлдэх учиртай. Даяаршлын их шуурганд өртөөд, хайран сайхан хэлээ мартаж үл болно.

Дэлхий нийтээрээ даяаршиж байгаа өнөө үед танийг хөгжлөөс хоцор гэх гэсэнгүй. Гадаад хэл сурч болохгүй гэж байгаа биш шүү. Харин үндэс угсаа, өв соёлоо хамгаалан үлдэх жаахан ч болов сэтгэлтэй байгаасай гэж хүсэж байна. Эх хэлээрээ зөв яриж, зөв ойлгож сурах нь хамгаас чухам зүйл юм шүү, охидоо.

Хэл, хил, мал гуравтайгаа байхад Монгол баян.