Ногоон сонгинотой мантуу

2015-12-14

Шөлтэй хоолондоо хачирлаж хийдэг мантуугаа хэрхэн амттай, сайхан харагдахаар хийж болохыг хүргэж байна. Зүгээр нэг мантуу биш.

Орц : 500 гр гурил , 250 мл сүү , 5 гр дрож

Бүлээн сүүнд исгэгчээ уусгаад 5 минут тавина . Гурилаа бага багаар хийж нэг их хатуу биш зуурна .

1-1.5 цаг буюу гурил 2 дахин хөөтөл нь дулаан газар тавина .

Хуруугаа зоож үзэхэд буцаж агшихгүй ийм нүх болж тогтож байвал зөв хөөсөн байна гэж үзнэ .

Ногоон сонгино , хиам юм уу сосискоо жижиг хэрчинэ .

Жич : Ногоон сонгиноо угаагаад уутанд хийгээд хөлдөөчихвөл их амар байдаг . Манай ойр хавьд ногооны дэлгүүр байхгүй тул 2-3 багцаар нь аваад ингээд хадгалчихвал шарлахгүй амар байдаг юм .

Нийт гурилаа 2 хуваагаад зузаандуухан элдээд нимгэн тослоод давс цацна . Дээрээс нь хиам , ногоон сонгиноо тарааж тавина .

Хуйлаад 2 см орчим өргөнтэй хэрчинэ . Ер нь жижгэвтэр тусмаа "хөөрхөн" , үзэмжтэй болно . Хэрчсэн тус бүрийнхээ яг голоор нь нарийхан савхаар чанга дарна .

Тосолсон жигнүүр дээрээ зайтайхан тавина . Жигнүүртээ хийгээд таглаад плиткээ асаалгүй 15-20 минут тавьж хөөлгөнө.

Жигнүүртээ хүйтэн ус хийгээд залгаад яг буцалснаас нь хойш 15-20 минут жигнэнэ .

Нэг давхар бол 15 минут , 2 давхар жигнүүр бол 20 минут г.м

Минутаа болохоор салгаад 5 минут тэр хэвээр нь таглаатай байлгана .--- Энэ хамгийн чухал нь , шууд тагийг нь авбал хөөлт нь буучихдаг .

Зүгээр нэг мантуу байснаас үзэмжтэй, амттай байвал гоё шүү дээ. Шөлтэй хоолны амтат хачир

Гоё ээж блогоос

Сэтгэгдэл:

Таны IP: (216.73.217.103)

АНХААРУУЛГА: Уншигчдын бичсэн сэтгэгдэлд emegteichuud.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.