Уйгар гаралтай жүжигчин Дильраба Дильмурат

Хамгийн алдартай шинэ үеийн жүжигчдийн нэг бол Уйгар гаралтай Хятадын жүжигчин, загвар өмсөгч  Дильраба Дильмурат юм. Тэрээр 1992 оны 6 -р сарын 3 нд төрсөн бөгөөд өдгөө 26 настай. Бага байхаасаа урлагийн авъяастай байсан тэрээр жүжигчин болох хүсэл мөрөөдөлтэй байв. Шанхайн Театр Урлагийн Академийг төгсөөд загвар өмсөгчөөр ажиллаж эхлэсэн. Улмаар кино салбарт хөл тавьж "Jay Walk Studio"  - ийн жүжигчин болж, "Swords of Legends" буюу "Домгийн сэлэм" болон "Diamond Lover" буюу "Миний эрдэнэ" зэрэг телевизийн цуврал кинонд тоглосоноор тун богино хугацаанд алдартай болсон юм. Солонгосын алдарт жүжигчин Чонь Жи-хёнь - той тун төстэй гэж яригддаг бөгөөд Солонгосд ч тун алдартай нэгэн болжээ. Учир нь хэд хэдэн цуврал кинонд нь тоглосон юм байна. 

2013-2016 оныг өөрийн алтан үе гэж ярьдаг. Учир нь энэ л хугацаанд маш олон боломжууд олдсон бөгөөд тэр бүгдийг шантралгүй ашиглаж, тууштай хичээж ажилласаны үр дүнд амжилтанд хүрч, нэр алдартай болсон гэж ярьсан байна. Хэд хэдэн богино хэмжээний кинонд тоглож, хамгийн анх 2013 онд "Anarhan" хэмээх киноны гол дүрд тоглосоноос хойш олон киноны урилга авч, кареер нь хурдацтай өсөж эхлэсэн юм. 2017 онд Солонгосын ангит кино болох "Pretty Li Hui Zhen" , Хятадын телевизийн түүхэн цуврал "The King"s Woman" , "Eternal Love" зэрэг кинонд тоглосон бөгөөд бүгд тун амжилттай болсон байна. 2018 онд "The Flame"s Daughter" ,  "Sweet Dreams" зэрэг олон ангит кинонд тоглосон бөгөөд 2019 онд дэлгэцнээ гарах "Three Lives, Three Worlds, The Pillow Book" киноны зураг авалтандаа ороод байгаа юм. 

2015 онд "Миний эрдэнэ" киноны дүрээрээ 7 дахь удаагийн "China TV Drama Awards" -аас "шилдэг шинэ жүжигчин" номинацын эзэн болсон бол "China Britain Film Festival" - аас "шилдэг шинэ жүжигчин" шагналыг хүртжээ. 

Дильраба Дильмурат англи, орос, хятад, уйгар хэлээр чөлөөтэй ярьдаг. Аялаж, дэлгүүр хэсэх хоббитой бөгөөд хар, цагаан өнгөнд дуртай юм байна. Өөрийн хувийн амьдралын талаар хэвлэллийнхэнд ярих тун дургүй бөгөөд тэр болгон ам нээгээд байдаггүй. Одоогийн байдлаар гэрлээгүй байгаа ч "William Chan"  -тай үерхэж байгаа хэмээн хэвлэлүүд бичээд байгаа юм. Учир нь тэд хэд хэдэн арга хэмжээнд цуг ирсэн байна. 

Түүний хамтран ажилладаг хүмүүс нь тун ам сайтай байдаг бөгөөд "Дильраба тун хөдөлмөрч, шаргуу, хичээнгүй ажилладаг. Мөн ямар ч зан ааштай хүмүүстэй зохицон ажиллах чадвартай. Энэ бол ховордож байгаа зан чанар шүү. Түүний бууж өгдөггүй, бүгдийг чин сэтгэлээсээ хийдэг нь амжилтанд хүрэх нэг шалтгаан нь гэж бодож байна" хэмээн ярьсан байна. Гоо үзэсгэлэн төгс жүжигчин бүсгүйн фэнүүдийн тоо өдрөөс өдөрт өссөөр байна. 

Хараад л баймаар хөөрхөн түүний фото зургуудаас