Жинхэнэ хайр

“Time” сэтгүүлийн сүүлийн дугаарт поз авсан загвар өмсөгчийн зураг биш дөрвөн настай хүү сандал дээр зогсон ээжийнхээ мөөмийг хөхөж буй зураг гарсан нь бас нэг маргааны сэдэв болж байна. Тус сэтгүүл шинэ дугаараа 1992 онд хэвлэгдсэнээс хойш шуугиан дэгдээж буй  “Хүүхдийн ном” номонд зориулжээ.

Доктор Билл Сирс түүний эхнэр Марта нарын зохиосон уг номонд хүүхдийг хөхөөр хооллож, өвөртлөн унтаж, хуурайлахад эх үрийн хооронд үүсдэг нандин холбооны талаар өгүүлдэг аж. Хүүхдийг хөхөөр хооллохын ач тусын тухай дэлхийн нийтээр ярьж буй энэ үед “Time” сэтгүүл Жемие  Линн гэгч Лос Анжелес хотод амьдардаг бүсгүйтэй ярилцжээ.

Жемие Линн бол хүүхдээ хөхөөр хооллох нь хүн болохын эхлэл гэдэгт итгэдэг хүмүүсийн нэг. Бүсгүй дөрвөн настай Арам, таван настай өргөмөл хүү Самуэлийг одоо ч хөхнөөс нь гаргаагүй аж.

Дөрвөн настай Арам хүү сандал дээр зогсон мөөмөө хөхөж буй зураг зураглаачийн санаа байсан боловч Жемие үүнийг хөндөж буй сэдэвтэй холбоотой гэдгийг удалгүй ойлгожээ. Гэвч хэргийн учир зурганд биш, эхийн цагаан сүү, зөн совингоор холбогдсон эх үрийн нандин холбоонд байгаа юм.

Жемие 2010 онд Этиопиос өргөж авсан Самуэль хүү нь англи хэл хурдан сурсныг хөхөөр хооллосонтой холбоотой гэдэгт итгэдэг. Хүүд англи хэл заагаагүй боловч тэр англи хэлийг яг л төрөлх хэл шигээ сурсан юм. Бүсгүй өөрөө хүртэл зургаан нас хүртлээ ээжийнхээ мөөмийг хөхсөн нэгэн аж. Тиймдээ ч бүсгүй хөвгүүдээ хөхнөөс гаргах гэж яараагүй гэнэ.

Н.Рэй