Аавын минь магтаал хамгийн том шагнал захидал
Сайн байцгаана уу? emegteichuud.mn сайтын хамт олон. Та нартаа энэ өдрийн мэндийг хүргээд, ажлын амжилт хүсэн мэндчилье.
Намайг Т гэдэг, би 16 настай эрэгтэй. Танай сайтыг би гарсан цагаас нь эхлээд уншиж байгаа. Надад маш их таалагддаг. Саяхан танай сайтаас зарласан “Аавуудаа гэртээ эрт хариарай” аяныг олж хараад би танай сайтынханд захидал бичье гэж шийдсэн юмаа.
Би 3 дүүтэй айлын том нь. Аав минь хөдөө ажилладаг болохоор сарын хагаст нь гэртээ, хагаст нь хөдөө ажил руугаа явчихна. Намайг 5 настайгаас хойш л аав хөдөө ажиллаж байгаа. Аав ээж хоёр маань намайг айлын том хүүхэд, миний хүү ухаантай бай, ажилсаг бай, дүү нартаа сайн үлгэр дууриал үзүүл гэдэг үгсийг өдөр бүр хэлж захидаг байлаа. Би 12 настайгаасаа эхлээд хоёр дүүгээ харж хооллож ундаллаж, усанд оруулж сурсан. Хоёр дахь дүүдээ би бантанг нь бэлтгэж өгч, гадаа салхинд авч гардаг байлаа. Дүү нараа харахынхаа хажуугаар гэрийнхээ ажлыг амжуулна, хичээлээ хийнэ. Ингээд удалгүй 3 дахь дүү маань төрлөө. Миний ажил улам л нэмэгдсэн. Гараа цэврүүттэл даавуу угаана. Өглөө оройд дүүгээ салхинд авч гарна. Гэхдээ би эдгээр ажлуудыг хийхдээ дуртай байдаг. Аавыг гэртээ ирэхийг хоног тоолон хүлээнэ. Аав ирэхэд нар минь гардаг. Хөвгүүдээ эрхлүүлж, гадуур зугаална. Миний ажил ч багасдаг.
Аавыг ирэхэд гэр минь дүүрч, амьдрал гэрэл гэгээтэй болж, би гэр лүүгээ яаран ирдэг. Аавын эзгүйд би “аав” болчихно. Ээж минь намайг “15 настай аав” гэдэг байлаа. Учир нь гэвэл би аавыгаа ажилдаа явчихаар, аавынхаа хийдэг бүхий л ажлыг амжуулах гэж хичээнэ.
Ангийн хүүхдүүд хичээлээ тараад кино үзэх, тоглох гээд яардаг байхад, харин би гэр лүүгээ дүү нар луугаа яардаг байлаа.
Би айлын том хүүхэд, 3 дүүтэй аав минь бидний төлөө ажиллаж яваа гэж бодохоор надад асар их хариуцлага ноогддог. Миний амьдрал бусад хүүхдүүдийнхээс өөр. Аав минь хөдөөнөөс, ажлаасаа ирэх бүрдээ намайг шагнадаг. Хамгийн гоё шагнал нь түүний магтаал. Аавыгаа ирэхийг тэсэн ядан хүлээж байна. Ааваа. Та гэртээ хурдан ирээрэй.
Хүү..... Т
Манай сайт танд таалагдаж байвал LIKE хийгээрэй. Танд баярлалаа
