Бүсгүй та орой унтахдаа нүүрнээсээ гадна хөлөө арчилж байгаарай

Орой унтахдаа хүүхнүүдийн олонхи нь хөлөө бус нүүрээ арчилдаг.  Өөрөөр хэлбэл бид хөлөндөө төдийлөн ач холбогдол өгдөггүй.  Гэтэл нуруу, хөл хоёр өдөржингөө бидэнтэй хамт ажилладаг.  Иймд хөлөө ч бас амрааж, тайвшруулах хэрэгтэй шүү.

 Хэрэв та хөлөө эвэршүүлэхгүй, хөлийнхөө тавхайг хавтгайруулахгүй, үргэлж тэгш шулуухан, сайхан хөлтэй байя гэвэл доорх дасгалыг хийгээрэй.

Юуны өмнө хөлөө амраах тун энгийн аргыг зааж өгье.  Энэ нь нүүрээ арчлахаас ч амархан.  Орой унтахдаа та дээш харж хэвтээд, хөлөө өргө.  Эсвэл орны толгой, хана зэрэг арай өндөрлөг зүйл рүү жийж, 20-30 минут хөлөө амраагаарай.  Мөн нэг шугам дагуулан гишгээд өсгийгөө шалнаас салгахгүйгээр, хуруундаа аль болох дээш нь өргөхийг хичээ.  Хөлийн хуруугаа бас  дотогш хумь.  Энэ танд хөл амраах хамгийн энгийн дасгал юм.  

Харин одоо хавтгай тавхайтай хүмүүст зөвлөгөө өгье.  Явган явах, гүйх, харайх нь хавтгай тавхайд сайн засал болдог.  Чийгтэй зүлэг ногоон дээгүүр  хөл нүцгэн гүйх нь маш таатай дасгал болдог бөгөөд цусны эргэлтийг сайжруулна.  Араараа явах нь хавтгай тавхайтай болохын эсрэг маш сайн дасгал болно.