Дурлалд нас үнэхээр хамаагүй гэж үү
Би
оюутан болоод удаагүй байхдаа нэгэн залуутай танилцсан юм. Залуу ч гэж ахтай
гэх юм уу. Тэр үед миний хувьд хамаг амьдрал минь замбараагүй байсан үе. Сэтгэл
санаагаар унаад, арга барахдаа нэгэн сэтгэл зүйч дээр очсон минь одоо надад
асуудал болоод байна. Сэтгэл зүйчийн өрөөнд ортол нүдэнд дулаахан ах буйдан
дээр суу гэхэд нь яагаад ч юм их л итгэж болохоор хүн шиг санагдсан юм. Тун
тайван яриатай, дөлгөөнхөн, ухаалаг харцтай ах надруу хараад "би чиний
хогийн сав байна, дотор байгаа хамаг муухай бүхнээ надруу шид. Надад огт санаа
зоволтгүй, би тэрнийг зүгээр л гаргаад асгачихана" гэж хэллээ.
Дотор
эргэлдэх түмэн бодол зовлонгийнхоо альнаас нь эхлэж ярихаа мэдэхгүй хэсэг
чимээгүй сууснаа уйлмаар санагдаад эхлэв. Нулимсаа барьж ядахад хамрын самсаа
сэрвэгнээд л... тэсэлгүй уйлчихлаа. Өнөөх ах намайг аргадсан ч үгүй уйл уйл гэж
хэлээд чимээгүй хараад л суугаад байв. Уйлж уйлж сая нэг тайвширлаа. Ярих зүйл
маань ч ар араасаа ундарч асуудлаа ярьж эхэлсэн юм. Энэ үед миний царай ямар
аймаар харагдаж байсан бол гэж одоо бодохоос ичмээр санагддаг. Тэр өдрөөс хойш
хэд хэдэн удаа сэтгэл зүйч ахтай уулзсаны дараа сэтгэл онгойгоод амьдрал ямар
сайхан юм бэ гэх сэтгэгдэл төрсөн юм.
Тэр үед сэтгэл зүйч ахаас өөр намайг ойлгох хүн байхгүй мэт санагдаж, яагаад ч юм цаанаа л дотно, сэтгэлд дулаахан санагдана. Бид уулзсаар нэг л мэдэхэд бие биедээ хайртай болсон байлаа. Эхэндээ ч элдэв янзын зүйл бодолгүй явсан ч нэг л мэдэхнээ холдож чадахгүй болтлоо дурлачихсан. Бид таван жил болж байна. Энэ хугацаанд олон удаа салахаар шийдэж, намайг хэзээ нэгэн цагт харамсахвий гэхээс айж байна гэж дандаа л хэлнэ. Тиймээ бид салах гэж хичээсэн даанч одоо хир нь чадахгүй байсаар...
Энэ тухайгаа ээждээ хэлэхээр шийдээд цайны цагаар нь уулзлаа. "Би өөрөөсөө 15 ах хүнд дурлачихлаа" гэж хэлтэл ээжийн харц гайхав уу гэлтэй огцом надруу харсанаа "Толгой чинь эргүүтээ юу" гэдэг байгаа. Хэрэг бишгүйтэж байгаа нь энэ. "Худлаа ярьсан юм аа" гэж тоглоом шоглоомоор өнгөрөөсөн дөө. Уг нь дурлалд нас хамаагүй гэдэгсэн. Залуу насанд өчнөөн л сайхан залуу гарч ирэх юм. Гэхдээ л тэрнийг минь гүйцэх хүн энэ хорвоод үгүй мэт санагдана. Бид ямар замыг сонгох ёстой юм бол доо. Багын найзаас минь өөр миний сонголтыг дэмжих хүн алга. Та бүхнээс хариу хүсье.
