Чи минь миний инээмсэглэх шалтгаан

Гэгээн хайрын баяр болох гэж буйтай холбогдуулан бүсгүйчүүд та бүхнийхээ дунд "Хамгийн сайхан хайрын түүх хэнийх вэ?" захидалын уралдааныг зарласан билээ. Бүсгүйчүүд маань захидалаа илгээж эхэллээ. Хамгийн анхны захидалыг танд хүргэе!

Чи минь миний инээмсэглэх шалтгаан

Чи минь миний чимээгүй ирсэн хайр

Чимэг гоёлгүй даруухан ирсэн жаргал

Ганцхан удаа амьдрах хорвоо дээр

Гарыг чинь атгаад суумаар байна

Гал халуун хүслээ чихэнд чинь шивнээд

Ганцаардлыг мартан амьдармаар байна.

Харвасан сум шиг шуугиад өнгөрсөн цаг хугацааг зогсоогоод эргэн нэг харлаа. Цонхны хажууд зогсоод гадаах ертөнцийг ажиглан зогсох би дуртай. Цэнхэр тэнгэр, шувууд, салхинд найгах моддын чимээ тэр дундаа гудамжаар хөтлөлцөн алхах хосууд. Гадаа хүйтэн, зэврүүн байсан ч хөтлөлцөн яваа хосыг харахаар сэтгэлд дулаахан санагддаг юм. Нас нэмэхийн хэрээр хүн хажуудаа хэн нэгэн хүнийг байлгахыг хүсдэг юм шиг.

Б. Анхаагаас...

Сурагчийн ширээнээс оюутны ширээнд шилжин суралцах цаг иржээ. Оюутан нас хайр дурлал, амьдралын тухай харамгүй хичээл заадаг. Намрын шаргал навч, анхны цас, анхны бороо тэгээд зуны амралт ирлээ.

Энэ л зун надад хайр бэлэглэсэн юм. Зуны амралтаа би зүгээр сууж өнгөрөөсөнгүй ажил хийлээ. Ажлын анхны өдрөөс тэр минь намайг харж эхлэсэн гэж ярьдаг юм. Бүтэн нэг сар надтай юу ч ярьдаггүй байсан тэр нэгэн хөвгүүний анх надад хандаж хэлсэн үг бол Инээхлээрээ чи хөөрхөн юм аа. Дандаа инээж байгаарай гэсэн үг байсан юм.

Тэр өдрөөс хойш түүний харц нэг л дулаахан намайг ширтдэгийг анзаарсан билээ. Ингээд л бид хоёрын хайрын түүх эхлэсэн юм. Нэг нэгнээ харах тоолондоо ичингүйрч, зүрх хүчтэй цохилно. Бид хоёрын үерхэл 8 сарын 9-ны тэр нэгэн өдөр эхлэсэн.
 

Анхны болзоо хөгжөөнтэй бас ичингүйрэлтэй. Гэнэт бороо орсон юм. Гар гараасаа хөтлөлцөөд гүйсэн тэр мөч одоо болтол санаанаас гардаггүй. Чиний минь надад хэлсэн Би чамд хайртай гэдэг үг ямар ч бэлэгнээс илүү.

Учир нь тэр үг намайг маш их баярлуулдаг. Надад хайр зуны тэр нэгэн өдөр ирсэн учраас би түүнийгээ зунтай зүйрлэдэг. Дулаахан, зөөлөн бас зүрх сэтгэлд ойр. Бид хоёрын хайр гоё ганган хувцас, хэрэглээгээр хэмжигдээгүй харин энгийн хэрнээ агуу биенээ биенээ гэсэн итгэл, сэтгэлээр хэмжигдсэн.

Энэ зунаас хойш гурван зун нэгэнтээ улиран оджээ. Өвөл, хавар, зун, намар ирэх дөрвөн улиралд бидний үерхэл, бидний хайр энэ хэвээрээ л үргэлжилнэ гэдэгт итгэл дүүрэн байна.

Бүсгүй та ч гэсэн сэтгэл хөдлөм сайхан хайрын түүхээ дараах хаягаар бидэнд илгээгээрэй. Хамгийн сайхан хайрын түүх хэнийх вэ? 2.14-ны өдөр тодрох болно
захидал хүлээн авах хаяг: Info@emegteichuud.mn

Дурлалт бүсгүй танд амжилт хүсье. Амжиж илгээгээрэй.