Охин нас хамгийн жаргалтай

Аз жаргалтай амьдрал гэж байдаггүй юм. Харин аз жаргалтай өдрүүд л амьдралд байдаг гэсэн. Ингэж ярих хүмүүс цөөнгүй болжээ. Үнэндээ бодоод байхнээ энэ үнэн бололтой. Хүн бүхэн л сайн сайхныг мөрөөдөн амьдардаг. Сайн хань ижилтэй, олон сайхан хүүхдүүдтэй, орох оронтой унах унаатай л байвал амьдрал сайхан юм шиг...

Хүн болж хорвоод мэндлэнэ гэдэг юутай ч зүйрлэшгүй их хувь тавилан...Үүнтэй хэн ч маргашгүй. Гэхдээ бүсгүй хүн болж төрнө гэдэг “бусдын төлөө амьдар “ гэсэн үг юм шиг надад санагддаг юм. Саяхан би нэгэн эс судлаач эрдэмтэн бүсгүйтэй ярилцсан юм. Тэр энэ бодлыг минь бататгаад өгсөн. Тэрээр “ Эм эснүүд бүр цаанаасаа л эр эснээс ялгаатай. Тэд бусдыг хамгаалах арчилж бөөцийлөх зөөх бас эр эсний нөмөр нөөлөгт хоргодон дагадаг” гэж ярьсан. Нээрээ л бүсгүй хүний хувь тавилан энэ л юм даа. Би боддог юм. Эмэгтэй хүн болж төрсний хамгийн жаргалтай үе бол “охин нас”...Ээжийнхээ энгэрт эрхэлж, аавынхаа нуруунаас зүүгдэж, явсан жаргалтай сайхан үе охин үед л байсан. Ирээдүйгээ урт даашинз, өндөр өсгийтөөр төсөөлж, өнөөдөр л сайхан байвал маргаашийн тухай бодохыг ч хүсдэггүй байж дээ. Охин байхад бүх юм сайхан гэрэл гэгээтэй. Үсээ буржийлгаад, нүүрээ будаад ганган даашинз өндөр өсгийт өмсөөд явахыг л мөрөөддөг байсансан. Ай болдогсон бол тэр л жаргалтай насандаа эргээд нэг зочлохсон доо...