Пакистан эмэгтэй Парисын хүндэт иргэн болжээ

2015-03-19

E404cf 141020165557 asia bibi family photo story top x800

Парис хотын Зөвлөл Пакистаны оршин суугч Асия Биби гэх эмэгтэйд хотын хүндэт иргэн цол олгох шийдвэр гаргажээ. Энэ эмэгтэй эх орондоо Аллахыг доромжилсон хэргээр цаазын ял сонсоод байгаа юм байна.

Хүндэт иргэн цол олгох тухай саналыг Парис хотын дарга Анн Идальго гаргажээ. “Энэ алхмаараа Парис хот дэлхий даяар шашны үзэл суртал болон улс төрийн нөхцөл байдлын золиос болж байгаа эмэгтэйчүүдтэй эв санаа нэгтэй байгаагаа баталж байна” хэмээн тэрбээр ийнхүү цол олгох болсноо тайлбарлажээ. Хотын даргын саналыг хотын зөвлөлийн гишүүд дэмжсэн байна.

Парисын хүндэт иргэн болсон, загалмайтан шашинтай Биби гэх эмэгтэй таван хүүхэдтэй, 2010 оноос эхлэн шоронд хоригдож байгаа юм байна. 2014 оны аравдугаар сард Лахорын Дээд шүүх түүнд оноосон дүүжлэн хороох ялыг хэвээр баталсан юм. Сүүлийн шатны шүүх хурал энэ оны тавдугаар сард товлогджээ.

Парис хотын дарга Идальго Пакистаны төр засаг Бибиг өршөөх ёстой хэмээн мэдэгдсэн байна. Түүнчлэн Парис хот Пакистан эмэгтэйн гэр бүлийг хүлээж авахад бэлэн байгаа хэмээжээ.

Дашрамд дуулгахад Парис хотын хүндэт иргэн хэмээх цолыг 2001 оноос эхлэн олгож байгаа аж. Одоогоор энэ цолыг 14 хүн хүртсэн бөгөөд тэдний дотор XIV Далай лам, Нельсон Мандела, Оросын нисэхийн зохион бүтээгч Андрей Туполев зэрэг олон алдартан багтдаг юм.

2015 оны нэгдүгээр сард энэ цолыг анх удаа хуулийн этгээдэд олгож байв. Тодруулбал алан хядагчдын гарт уран бүтээлчид нь амиа алдсан Францын “Шарли Эбдо” сонин Парисын хүндэт иргэн цолыг хүртэж байжээ.

Сэтгэгдэл:

Таны IP: (216.73.217.103)

АНХААРУУЛГА: Уншигчдын бичсэн сэтгэгдэлд emegteichuud.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.