Гоо сайхны хагалгаанаас болж 28 настай бүсгүйг 60 настай хүн шиг болголоо

Хятадын Ганьсу мужийн оршин суугч 28 настай Хао Лян дур булаам байдал ажил хөдөлмөр, хүмүүсийн хандах хандлагад яаж нөлөөлдөгийг ойлгожээ. Хэрэв тэр царайлаг байсан бол өөр ажилд дуртайяа орох байсан аж. Ингээд Хао бүсгүй 17 настайдаа гоо сайхны мэс засалд оржээ. Шалтгаан нь “ажлын шаардлагаар” гэнэ. Дарга нь нэг бус удаа түүний хэтэрхий туранхай нүүртэй хэмээн доромжилж, нүдэнд хүйтэн харагддаг гэжээ.

Ингээд бүсгүй гоо сайхны хагалгаа хийлгэхээр шийдэж, хэд хэдэн эмнэлгийн танилцуулгыг үзжээ. Гэсэн ч хэтэрхий үнэтэй тусч байв. Гэтэл нэг удаа түүнд танил нь гоо сайхны хагалгааг хямд үнээр, хувиараа хийдэг эмчийн тухай дуулгасан байна. Ингээд “мэргэжилтэн” Хаод сарын турш 10 хагалгаа хийж, мөрөөдлийг нь биелүүлжээ. Гэвч одоогоос дөрвөн жилийн өмнө асуудлууд урган гарах болсон байна.

Гэнэт л бүсгүйн нүүр хавагнаж, хамар болон нүдний хэлбэр өөрчлөгдсөн аж. Тайлбарлах аргагүй энэ явц үргэлжилсээр 2013 онд Хао өмнөхөөсөө тэс өөр хүн болон хувирч, бүр үс нь унаж эхэлсэн байна. Үүний дараа 28 настай Хао бүсгүй яг 60-тай хүн шиг харагдах болжээ. Эмч нар ч Хаогийн хачин өөрчлөлтийг удаан хугацааны турш тайлбарлаж чадахгүй байжээ. Эхэндээ бөөр, элэгтэй холбон тайлбарлаж байсан ч хожим хагалгаа хийсэн мэс засалч Хаогийн нүүрний эд эсэд анагаах ухааны салбарт хэрэглэхийг хориглосон полиакриламид гель шахчихсанд хамаг учир байжээ. Ийнхүү 10-аад жилийн турш бэлдмэл эд эсээр “цагаачилж”, сүйтгэсэн тул бүтэн сэргээн засах хагалгааны дараа ч сэргэнэ гэдэг баталгаа өгч чадахгүй гэдгээ эмч нар хэлсэн байна.